“ನನ್ನ ಪ್ರಿಯ ಮನಸ್ಸೇ, ಸ್ವಲ್ಪ ನಿನ್ನ ಆಲೋಚನೆಯ ಹಾದಿಯನ್ನು ಬದಲಿಸಿ ನೋಡು. ನೀನು ಯಾವುದನ್ನು ಕಂಡು ನಡುಗುತ್ತಿದ್ದೀಯೋ, ಆ ‘ಮೃತ್ಯು’ ಎನ್ನುವುದು ನಿಜವಾಗಿಯೂ ಭಯಾನಕವೇ?
ನಾವು ಜೀವನದ ಪ್ರತಿ ಹಂತದಲ್ಲೂ ಸುಖವನ್ನು ಹುಡುಕುತ್ತೇವೆ. ಉಣ್ಣುವ ಅನ್ನ, ಓಡುವ ದಾರಿ ನಮಗೆ ಸಂತೋಷ ನೀಡುತ್ತದೆ ಎನ್ನುವುದಾದರೆ, ಎಲ್ಲ ಜವಾಬ್ದಾರಿಗಳಿಂದ ಮುಕ್ತಿ ನೀಡುವ ಆ ಕೊನೆಯ ಪಯಣ ಯಾಕೆ ಸುಖವಾಗಿರಬಾರದು? ಯೋಚಿಸು, ಭಯವಿರುವುದು ಸಾವಿನಲ್ಲಲ್ಲ, ನಿನ್ನ ಆಲೋಚನೆಯಲ್ಲಿ.
ಸಂತರು ಹೇಳುವಂತೆ, ‘ನಾನು ಬದುಕಿನ ಸುಖವನ್ನು ಅರಿತಿದ್ದೇನೆ, ಸಾವಿನ ಭಯವನ್ನಲ್ಲ’. ಯಾಕೆಂದರೆ ಅವರು ಬದುಕನ್ನು ಪೂರ್ಣವಾಗಿ ಪ್ರೀತಿಸಿದರು. ನಿನಗೆ ಸಾವಿನ ಭಯ ಕಾಡುತ್ತಿದ್ದರೆ ಅದರರ್ಥ ನೀನು ಇಂದಿನ ಬದುಕನ್ನು ಸರಿಯಾಗಿ ಬಾಳುತ್ತಿಲ್ಲ ಎಂದು. ಮನುಷ್ಯ ಜನ್ಮ ತಾಳಿದ ಮೇಲೆ ಅಂತ್ಯ ಎನ್ನುವುದು ಅನಿವಾರ್ಯ. ಆದರೆ ಆ ಅಂತ್ಯವೆಂದರೆ ‘ಇಲ್ಲವಾಗುವುದು’ ಎಂದಲ್ಲ, ಬದಲಾಗಿ ‘ಮೂಲಕ್ಕೆ ಮರಳುವುದು’.
ನಿನ್ನ ಈ ಶರೀರ ಪಂಚಭೂತಗಳ ಕೃಪೆ. ಗಾಳಿ, ಮಣ್ಣು, ನೀರು ಸಾಲವಾಗಿ ಕೊಟ್ಟ ಈ ದೇಹವನ್ನು ಕಾಲ ಬಂದಾಗ ಪ್ರಕೃತಿಗೆ ಮರಳಿಸುವುದು ಒಂದು ಪವಿತ್ರವಾದ ಪ್ರಕ್ರಿಯೆ. ಸಾಲ ತೀರಿಸಿದಾಗ ಮನುಷ್ಯ ನಿರಾಳನಾಗಬೇಕೇ ಹೊರತು ಭಯಪಡಬೇಕೇ?
ಯಾವಾಗ ನೀನು ಈ ಶರೀರ ಮತ್ತು ಪ್ರಪಂಚದ ಮೇಲಿನ ಅತಿಯಾದ ಮೋಹವನ್ನು ಬಿಟ್ಟುಬಿಡುತ್ತೀಯೋ, ಆಗ ನಿನಗೆ ಮೃತ್ಯುವೆಂಬುದೇ ಇಲ್ಲವಾಗುತ್ತದೆ. ಸಾವನ್ನು ಗೆಲ್ಲುವುದು ಎಂದರೆ ಸಾಯದೆ ಇರುವುದಲ್ಲ, ಬದಲಾಗಿ ಸಾಯುವ ಮುನ್ನವೇ ಸಾವಿನ ಭಯವನ್ನು ಗೆದ್ದು ‘ಅಭಯ’ ಸ್ಥಿತಿಯಲ್ಲಿ ಬದುಕುವುದು.
ಆದ್ದರಿಂದ, ಸಾವಿನ ಬಗ್ಗೆ ಚಿಂತಿಸುವುದನ್ನು ಬಿಟ್ಟು, ಇರುವಷ್ಟು ದಿನ ಪಂಚಭೂತಗಳ ಈ ಅದ್ಭುತ ಕೊಡುಗೆಯನ್ನು ಸಾರ್ಥಕವಾಗಿ ಬಳಸಿಕೊ. ಭಯ ಮುಕ್ತನಾದಾಗ ಮಾತ್ರ ನೀನು ನಿಜವಾಗಿ ಬದುಕಲು ಸಾಧ್ಯ.”
ಅಂತರಂಗದ ಕನ್ನಡಿ: ಸಾವಿನ ಭಯವೇಕೆ? ಪರಮ ಪೂಜ್ಯ ಡಾ.ಮಲ್ಲಣಪ್ಪ ಸ್ವಾಮಿಜಿ
