ಬೆಂಗಳೂರು:
ರಾಜ್ಯದಲ್ಲಿ ಜಾತಿ ಹಾಗೂ ಪ್ರಾದೇಶಿಕ ಸಮತೋಲನದ ಹೆಸರಿನಲ್ಲಿ ಲಿಂಗಾಯತ, ಒಕ್ಕಲಿಗ, ಎಸ್ಸಿ ಮತ್ತು ಎಸ್ಟಿ ಸಮುದಾಯಗಳಿಗೆ ಎರಡು-ಮೂರು ಎಂ.ಎಲ್.ಸಿ. ಹಾಗೂ ಮಂತ್ರಿ ಸ್ಥಾನಗಳನ್ನು ನೀಡಿ ರಾಜಕೀಯ ಪ್ರಾತಿನಿಧ್ಯ ಕಲ್ಪಿಸುತ್ತಿರುವ ಕಾಂಗ್ರೆಸ್ ಪಕ್ಷವು, ಅಧಿಕಾರಕ್ಕೆ ಬಂದರೂ ಸಹ ರಾಜ್ಯದ ನಾಲ್ಕನೇ ದೊಡ್ಡ ಜನಾಂಗವಾಗಿರುವ ನೆಲ-ಜಲ ಬೇಟೆಗಾರ (ಮೀನುಗಾರ) ಸಮುದಾಯಕ್ಕೆ ಮಾತ್ರ ಎಂ.ಎಲ್.ಸಿ ನೇಮಕ ಹಾಗೂ ಮಂತ್ರಿ ಸ್ಥಾನ ನೀಡದೆ ಸಂಪೂರ್ಣವಾಗಿ ಕಡೆಗಣಿಸುತ್ತಿರುವುದು ಯಾಕೆ ಎಂದು ರಾಜ್ಯ ಬುಡಕಟ್ಟು ಜನಾಂಗ ಸಂರಕ್ಷಣಾ ಸಮಿತಿಯ ರಾಜ್ಯಾಧ್ಯಕ್ಷರಾದ ಅಮರೇಶಣ್ಣ ಕಾಮನಕೇರಿ ಕಟುವಾಗಿ ಪ್ರಶ್ನಿಸಿದ್ದಾರೆ.
ಕಾಂಗ್ರೆಸ್ ಪಕ್ಷವು ಜಾತಿ ಆಧಾರಿತವಾಗಿ ಎಂ.ಎಲ್.ಎ. ಟಿಕೆಟ್ ಮತ್ತು ಮಂತ್ರಿ ಸ್ಥಾನಗಳನ್ನು ಹಂಚಿಕೆ ಮಾಡುತ್ತಿರುವುದಾಗಿ ಹೇಳಿಕೊಂಡರೂ, ಪ್ರಾದೇಶಿಕ ನ್ಯಾಯದ ಹೆಸರಿನಲ್ಲಿ ಕೇವಲ ಕಲಬುರ್ಗಿ ಜಿಲ್ಲೆಗೆ ಮಾತ್ರ ಒತ್ತು ನೀಡುತ್ತಿದೆ. ಆದರೆ, ಬಾಂಬೆ ಕರ್ನಾಟಕ ಮತ್ತು ಹಳೆ ಮೈಸೂರು ಭಾಗದಲ್ಲೂ ಈ ಸಮುದಾಯದ ಜನಸಂಖ್ಯೆ ಗಣನೀಯವಾಗಿದ್ದರೂ ಅಲ್ಲಿನ ನಾಯಕರಿಗೆ ರಾಜಕೀಯ ಪ್ರಾತಿನಿಧ್ಯ ನೀಡದೆ ಕಡೆಗಣಿಸುತ್ತಿರುವುದು ಯಾವ ನ್ಯಾಯ ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಪ್ರಮುಖ ಅಸಮಾಧಾನದ ಅಂಶಗಳು ಮತ್ತು ಬೇಡಿಕೆಗಳು:
- ಎಂ.ಎಲ್.ಸಿ ನೇಮಕ ಹಾಗೂ ಮಂತ್ರಿ ಸ್ಥಾನದಲ್ಲಿ ವಿಭಿನ್ನ ಧೋರಣೆ ಏಕೆ?: ಲಿಂಗಾಯತ, ಒಕ್ಕಲಿಗ, ಎಸ್ಸಿ ಮತ್ತು ಎಸ್ಟಿ ಸಮುದಾಯಗಳಿಗೆ ಎರಡು-ಮೂರು ಜನರಿಗೆ ಎಂ.ಎಲ್.ಸಿ ಹಾಗೂ ಮಂತ್ರಿ ಸ್ಥಾನಗಳನ್ನು ನೀಡಿ ರಾಜಕೀಯವಾಗಿ ಮೇಲೆತ್ತುತ್ತಿರುವ ಪಕ್ಷವು, ನೆಲ ಮತ್ತು ಜಲ ಬೇಟೆಗಾರ ಸಮುದಾಯದ ವಿಚಾರಕ್ಕೆ ಬಂದಾಗ ಮಾತ್ರ ಕಡೆಗಣಿಸುತ್ತಿರುವುದು ಯಾಕೆ ಎಂದು ಅಮರೇಶಣ್ಣ ಕಾಮನಕೇರಿ ಪ್ರಶ್ನಿಸಿದ್ದಾರೆ. ಚುನಾವಣಾ ಸಂದರ್ಭದಲ್ಲಿ ಈ ಸಮುದಾಯಕ್ಕೆ ಎಂ.ಎಲ್.ಎ ಟಿಕೆಟ್ ಆಗಲಿ ಅಥವಾ ಕಾಂಗ್ರೆಸ್ ಪಕ್ಷ ಅಧಿಕಾರಕ್ಕೆ ಬಂದಾಗ ಮಂತ್ರಿ ಸ್ಥಾನವಾಗಲಿ ನೀಡುವುದಿಲ್ಲ ಎಂದು ಅವರು ಆರೋಪಿಸಿದ್ದಾರೆ.
- ಕಲಬುರ್ಗಿಗೆ ಮಾತ್ರ ಸೀಮಿತವಾದ ಪ್ರಾತಿನಿಧ್ಯ:
ಪ್ರಾದೇಶಿಕವಾಗಿ ಕಲಬುರ್ಗಿಯಲ್ಲಿ ಸಮಾಜದ ಜನಸಂಖ್ಯೆ ಹೆಚ್ಚಿರುವುದರಿಂದ ಅಲ್ಲಿ ಪ್ರಾತಿನಿಧ್ಯ ನೀಡಿರುವುದು ಸರಿ, ಆದರೆ ಬಾಂಬೆ ಕರ್ನಾಟಕ ಮತ್ತು ಹಳೆ ಮೈಸೂರು ಭಾಗದಲ್ಲೂ ಸಮುದಾಯವು ಹೆಚ್ಚಿನ ಪ್ರಮಾಣದಲ್ಲಿದೆ. ಅಲ್ಲೂ ಕೂಡ ಯಾಕೆ ಕಡೆಗಣಿಸುತ್ತಿದ್ದೀರಿ ಎಂದು ಅವರು ಪ್ರಶ್ನಿಸಿದ್ದಾರೆ.
- ಎಸ್ಟಿ ಮೀಸಲಾತಿ ಹೋರಾಟಕ್ಕೆ ನಿರ್ಲಕ್ಷ್ಯ:
ಸಮುದಾಯವು ಮೂಲತಃ ನೆಲ ಮತ್ತು ಜಲ ಬೇಟೆಗಾರರು ಎಂಬುದು ಎಲ್ಲರಿಗೂ ಗೊತ್ತಿರುವ ವಿಚಾರ. ದೇಶಾದ್ಯಂತ ಎಸ್ಸಿ, ಎಸ್ಟಿ ಮತ್ತು ಒಬಿಸಿ ಪಟ್ಟಿಯಲ್ಲಿ ಈ ಸಮಾಜವಿದ್ದು, ಕರ್ನಾಟಕದಲ್ಲಿ ಬೀದರ್, ಮೈಸೂರು, ಚಾಮರಾಜನಗರ ಮತ್ತು ವಿಜಯಪುರ ಜಿಲ್ಲೆಗಳಲ್ಲಿ ಮಾತ್ರ ಎಸ್ಟಿ ಪ್ರಮಾಣಪತ್ರ ಪಡೆಯುತ್ತಿದ್ದಾರೆ. ಉಳಿದ ಜಿಲ್ಲೆಗಳಲ್ಲಿ ಇರುವ ಜಾತಿಗಳನ್ನೂ ಎಸ್ಟಿ ಪಟ್ಟಿಗೆ ಸೇರಿಸಬೇಕೆಂಬ ಹೋರಾಟವಿದ್ದರೂ, ಸಂವಿಧಾನಬದ್ಧ ಹಕ್ಕು ನೀಡಲು ಕಾಲಹರಣ ಮಾಡಲಾಗುತ್ತಿದ್ದು, ಜನರಿಗೆ ಕೇವಲ ಸುಳ್ಳು ಭರವಸೆಗಳು ಮಾತ್ರ ಸಿಗುತ್ತಿವೆ.
- ರಾಜಕೀಯ ಪ್ರಾತಿನಿಧ್ಯದ ಕೊರತೆ: ಇಷ್ಟು ದೊಡ್ಡ ಸಮುದಾಯಕ್ಕೆ ರಾಜ್ಯದಲ್ಲಿ ಕೇವಲ ಒಬ್ಬರೇ ಎಂ.ಎಲ್.ಸಿ ಇದ್ದು, ಕಾಂಗ್ರೆಸ್ ಪಕ್ಷ ಅಧಿಕಾರಕ್ಕೆ ಬಂದರೂ ಸಚಿವ ಸ್ಥಾನವನ್ನೂ ನೀಡಿಲ್ಲ. ಬಾಂಬೆ ಕರ್ನಾಟಕ ಮತ್ತು ಹಳೆ ಮೈಸೂರು ಭಾಗದಲ್ಲಿ ಪಕ್ಷಕ್ಕೆ ನಿಷ್ಠೆಯಿಂದ ನಿರಂತರವಾಗಿ ಕೆಲಸ ಮಾಡುತ್ತಿರುವ ಅನೇಕ ರಾಜಕೀಯ ನಾಯಕರು ಇದ್ದರೂ ಅವರನ್ನು ಕಡೆಗಣಿಸಲಾಗಿದೆ.
ವಿಧಾನ ಪರಿಷತ್ (ಎಂ.ಎಲ್.ಸಿ) ಸ್ಥಾನಕ್ಕೆ ಪ್ರಮುಖ ನಾಯಕರ ಶಿಫಾರಸು:
ಬಾಂಬೆ ಕರ್ನಾಟಕ ಮತ್ತು ಹಳೆ ಮೈಸೂರು ಭಾಗದಲ್ಲಿ ಕಾಂಗ್ರೆಸ್ ಪಕ್ಷಕ್ಕೆ ನಿಷ್ಠೆಯಿಂದ ಸೇವೆ ಸಲ್ಲಿಸುತ್ತಿರುವ ಪ್ರಮುಖರಾದ,
- ವಿಜಯಪುರದ ಮಾಜಿ ಶಾಸಕ ಶರಣಪ್ಪ ಸುಣಗಾರ
- ರಾಮನಗರ ಜಿಲ್ಲೆಯ ಎಸ ಗಂಗಾಧರ್ ರೇಷ್ಮೆ ನಿಗಮ ಅಧ್ಯಕ್ಷರು
- ಕಾಂಗ್ರೆಸ್ ಮೀನುಗಾರ ವಿಭಾಗದ ರಾಜ್ಯಾಧ್ಯಕ್ಷರಾದ ಮಂಜುನಾಥ ಸುಣಗಾರ ಇನ್ನೂ ಅನೇಕ ಅರ್ಹ ನಾಯಕರಲ್ಲಿ ಒಬ್ಬರಿಗೆ ತಕ್ಷಣವೇ ಎಂ.ಎಲ್.ಸಿ.ಯಾಗಿ ನೇಮಕ ಮಾಡಬೇಕು ಹಾಗೂ ಪ್ರಾದೇಶಿಕವಾಗಿ ಬಾಂಬೆ ಕರ್ನಾಟಕ ಮತ್ತು ಹಳೆ ಮೈಸೂರು ಭಾಗದಲ್ಲಿ ರಾಜಕೀಯ ಪ್ರಾತಿನಿಧ್ಯ ಕಲ್ಪಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
ಕಾಂಗ್ರೆಸ್ ಪಕ್ಷಕ್ಕೆ ಎಚ್ಚರಿಕೆ:
ರಾಜ್ಯದ ನಾಲ್ಕನೇ ದೊಡ್ಡ ಜನಾಂಗವಾಗಿರುವ ಈ ಸಮುದಾಯವನ್ನು ನಿರಂತರವಾಗಿ ಕಡೆಗಣಿಸುತ್ತಾ ಬಂದರೆ, ಮುಂದಿನ ದಿನಗಳಲ್ಲಿ ಪಕ್ಷವು ಇದರ ತಕ್ಕ ರಾಜಕೀಯ ಫಲವನ್ನು ಅನುಭವಿಸಬೇಕಾಗುತ್ತದೆ ಎಂದು ರಾಜ್ಯ ಬುಡಕಟ್ಟು ಜನಾಂಗ ಸಂರಕ್ಷಣಾ ಸಮಿತಿಯ ರಾಜ್ಯಾಧ್ಯಕ್ಷರಾದ ಅಮರೇಶಣ್ಣ ಕಾಮನಕೇರಿ ಗಂಭೀರ ಎಚ್ಚರಿಕೆ ನೀಡಿದ್ದಾರೆ.
